أنا بكتب النهاردة و أنا عايز أتحبس .. خلاص أنا بايع القضية و ياكش تولع .. على ايه يعني اسكت .. ما خلاص السكوت ذهب - ولم يعد .. دماغي وجعتني من اتنين أبو الليف و القائم على اعمار مصر و اصلاحها " الحاكم بأمره : السيد رئيس الجمهورية المبارك" .. كل ما افتح صفحة جريدة ألاقيهم فيها .. صفحات النت موجودين فيها .. حتى مدونات متابعها بتتكلم عنهم .. افتح التليفزيون ألاقيه بيغني أنا "كينج كونج" و اقلب القناة ألاقي صورة "الرئيس" .. من الآخر كده الاتنين دول قرفوني في حياتي و حاسس اني ممكن ألاقيهم نايمينلي تحت السرير .. مرارتي اتفقعت .. خلاص زهقت .. عيد تحرير سيناء .. تعليقات غبية في الراديو .. ناس مستفزة على التليفزيون .. احنا حابين النصر جداً لكن حبنا للأجازة بسبب النصر أكثر .. التدوينة دي عايزة دماغ .. و انا دماغي سبتها في أول خرابة عشان ما اخدش بالي من اللي بيحصل الأيام دي .. لكن عشان خاطركم .. هروح أجيبها و راجع لكم .. يا رب ما يغتالوني قبل ما انفذ المهمة بنجاح و ارجع العقل المرمي في خرابة فيللا عم حسين الشحات ! .
---- فاصل و نواصل ----
---- عدنا ----
ما لقيتش أجمل من الكلمتين دول للأستاذ يوسف معاطي عشان أبدأ بيهم"مشكلة أي كاتب ان المادة الخام اللي بيشتغل بيها هي الناس .. يعني لازم عشان تكتب تعيش .. و اللي يعيش ياما يشوف "
اللي يعيش ياما يشوف؟؟؟!!!.. يادي النيلة.. هو أنا ممكن أشوف أكثر من العبط الرسمي اللي أنا شايفه ده؟!.. أكيد بتهزر.. على العموم أنا هحسس معاك على البطحة اللي على دماغ الاتنين.. الفنان و السياسي.. مش عارف ليه حاسس ان الاتنين بيشتغلونا .. آه و الله .. حاسس انهم بيشتغلونا .. واحد منهم بيقول" الإخوة المواطنون" .. و التاني بيقول " أنا مش خرونج" ..... الاتنين بيكملوا بعض فتلاقي واحد يقول "لا ينبغى - أبداً - أن يتحول هذا التفاعل والحراك النشط إلى مواجهة أو تناحر أو صراع" و التاني بيقول "أنا كينج كونج" .. واحد منهم يقول "لقد أطلقت عام 2005 عملية شاملة للإصلاح" و التاني يرد عليه و يقول " ده أنا وانا رابط إيدي بلعب بينج بونج" .. كده هطلع أنا و انتم بنتيجة مهمة جداً .. الرئيس سياسي فنان و أبو الليف فنان سياسي ..
زمان -مش زمان قوي- أيام الفن الجميل كان الواحد من الفنانين دول لو لقى اسمه مش "عاطفي" أو "سلس" أو "صعب" أو "طويل" و الأهم لو "غير معتاد " بيغيره على طول .. و معظم الفنانين المعروفين -زمان- غيروا أساميهم و تلاقي أساميهم حاجة تانية .. طبعاً التغيير بيكون عاطفي و سلس و سهل و قصير و "معتاد" بل "معتاد جداً" .
و دليلي أهه أسماء الفنانين الحقيقية :
- ام كلثوم................فاطمه ابراهيم البلتاجى
- وديع الصافى...................وديع فرنسيس
- صباح.............................جانيت فغالى
- انوشكا................فرتانوش حابيبس سليم
- اسمهان............امال فهد فرحان الاطرش
- محمد فوزى..................فوزى عبدالعال
- وليد توفيق........................وليد تونتجى
- نجاه الصغيره........نجاه محمد حسن البابا
- فله الجزائريه.....................فله العباسيه
- حكيم .........................عبدالصمد كامل
- كاظم الساهر.....كاظم عبدالجبار السمرانى
- فضل شاكر......................فضل شمندر
دلوقتي بقى أيام الفن ( النهاية باللغة الفرنسية Fin ) نلاقي الواحد من دول يدور على اسم "غريب" و "عجيب" و "مريب" و "يكسف" .. نلاقي مثلاً
نادر أنور جابر ...أبو الليف
متهيألي كل واحد حر في اسمه ، علقتوا على الاسم ليه بقى ؟ .. سعد الصغير انا احترمته بس لأنه ما غيرش اسمه و فِضِل صغير .. كل واحد حر في اختياراته الشخصية ..و لا ايه ؟ .. هو الاسم مش اختيار شخصي ؟... يبقى أبو الليف حر في اختياره لاسمه .. اشمعنى ام كلثوم غيرت اسمها و عبد الحليم اختصر اسمه ؟ .. هو مش انسان زي "الأناسين" (على رأي واحد زميلي ) .. و لا هو مخلوق تاني ؟
لكن زي ما له الحرية ، يبقى لي أنا كمان الحرية في الهجوم عليه - بأدب طبعاً - .. بس أنا هحتفظ برأيي ده لنفسي ..لأني ما ينفعش أحكم على موجة و أنا وسطها .. و احنا في وسط التجربة حكمنا بيكون مشوش و مش واضح لأن المعطيات مش بتبقى كامله .. يمكن مثلاً اللغة في مصر تبقى الانجليزية بعد كام سنة و يبقى أبو الليف ده عملة صعبة .. بدل ما نكلف نفسنا عناء الهجوم عليه .. نحاول نقول ايه العمل .. كعادة النقاد : الفنان اللي بيوصل للناس هو الفنان "المثير للجدل" .. و بدل ما يحاولوا يجيبوا حاجة ترضي ذوق الناس و تكون غير "مسفة" .. بيحاربوا الناس ...و البوست اللي فات بين أنا كنت بتكلم على ايه ... كل ما انت تنادي بأعلى صوتك عشان تقول رأيك اللي ضد الناس .. هتلاقي كل الناس صوتها تعالى ضدك و اصبحت انت في موقف " حرج "
افتكرت قصة جميلة بخصوص الموضوع ده بتقول :
( يحكى أن رجل أعمال دخل بار .. جلس .. نظر حوله .. حدق للرجل الجالس أمامه .. تعجب .. ابتسم .. فكر في نفسه .. " مش عارف ينفع اقوله ان فيه موزة في ودنه و لا لأ " .. تردد .. "متهيألي لازم أقوله ان فيه موزة في ودنه .... و انا مالي سيبني منه " .. تردد .. " أروح أقوله و اللي يحصل يحصل ... لأ" .. بعد لحظة تردد أخيرة استجمع قوته و انطلق صوب الرجل و قال له :
- يا أستاذ فيه موزة في ودنك
ايه ؟- فيه موزة في ودنك
اييييه ؟- ودنك فيها موزة يا أستاذ
اييييييه ... علّي صوتك- مووووووووووووووووووووووووووووزة في وداااااااااااااااااااااااااااااااااانك يا جدع انت
بكل برود رد عليه الرجل
أنا آسف لكن أنا مش سامعك ...علّي صوتك ..أنا فيه موزة في وداني ...و بعد التعب ده كله طلع عارف ان فيه موزة في ودانه ... و انت بتقول للناس ابو الليف ده استهتار بالقواعد ..و الناس بتسمعه أساساً عشان كسر القواعد دي ...ما هو لو ما كسرهاش ما حدش كان سمع له و لا سمع بيه
نيجي بقى للرئيس المثير للجدل راخر
مشكلتك يا ريس انك بتمثل النظام .. النظام اللي الناس كلها رافضاه .. رافضاه لأنه فوضوي .. عيوبه ظاهرة أكثر من مميزاته .. و الناس طالما انها اتعودت انها تكره نظامك يبقى استحالة تغير الفكرة دي بالكلام .. الكلام مش كفاية .. يمكن عشان الناس مش بتلمس حاجة بايديها بتقول كده .. يمكن عشان ما بيبطلوش خلفة بيقولوا كده .. لكن أبويا ملزم يأكلني و يشربني و يعلمني ويربيني لحد ما اكبر .. و بعد كده احس انه مضطهدني .. طبيعي .. لأنه مش بيتعامل معايا صح .. أنا مش فاهمه و هو مش فاهمني .. لغة التواصل بيننا مش موجودة .. و كلنا معتبرين انك بابانا -لا شك و لا جدال في ذلك- .. و معتبرين كمان ان مصر هي أمنا -بشهادة شاهد- .. و عارفين و متأكدين انه لا طلاق و لا خلع يفض العلاقة المنيلة بنيلة دي ..
خطاب الريس بمناسبة تحرير سيناء ( و الله الريس ده نعمة و يا رب اللي يكرهها ... و لا حاجة ) :
"إن ما تشهده مصر اليوم فى تفاعل نشط لقوى المجتمع، هو نتاج ما بادرت إليه منذ خمسة أعوام مضت، وهو دليل حيوية المصريين، وشاهد على ما يتمتعون به من مساحات غير مسبوقة لحرية الرأى والتعبير والصحافة، وأقول بكل الصدق والمصارحة إننى أرحب بهذا التفاعل والحراك المجتمعى، طالما التزم بأحكام الدستور والقانون، وتوخى سلامة القصد ومصالح الوطن."- "إن ما تشهده مصر اليوم " : جملة مخوفاني جداً
- "في تفاعل" : جار و مجرور .. المجرور هو احنا و الجار هو ( السكوت هنا من ألماظ مش دهب) .. و أهو النبي وصى على سابع "جار"
- "توخى سلامة القصد و سلامة الوطن" : و الله العظيم خوفك الزايد عن حده ده هو اللي مخلينا نقول عليك كل اللي بيتقال .." اكثر الناس خوفاً من المرض هم أكثرهم إصابة به"
" أنا اللي كان فارسني بغني من تالتة ابتدائي " ... عمك غنى من 5 سنين و قبلها بـ 5 سنين ..و ان شاء الله بعدها بـ 5 سنين .
"لا ينبغى - أبداً - أن يتحول هذا التفاعل والحراك النشط إلى مواجهة أو تناحر أو صراع، وعلينا جميعا أن نحاذر من أن يتحول التنافس المطلوب فى خدمة الوطن وأبنائه لمنزلقات تضع مستقبله ومستقبلهم فى مهب الريح."المواجهة و التناحر و الصراع دول مش فعل .. دول رد فعل .. يبقى استحالة يتحول الحراك النشط - على رأيك - إلى تناحر ..
أكيد في عقل بالك بتقول الجملتين دول ..." أنا مش خرونج ...أنا كينج كونج "
"إن مستقبل الأوطان لا تصنعه الشعارات والمهاترات والمزايدة، ومقدرات الأمم والشعوب لا تتحقق بخطوات غير محسوبة العواقب، ونحن فى مصر نمضى فى الإصلاح السياسى واعين لظروف مجتمعنا ومحذرين من انتكاسات تعود بنا إلى الوراء، وإننى - ونحن مقبلون على الانتخابات التشريعية العام الحالى والرئاسية العام المقبل - أعاود تأكيد حرصى على نزاهة هذه الانتخابات، وأرحب بكل جهد وطنى صادق يطرح الرؤى والحلول لقضايا ومشكلات مجتمعنا، ولا يقامر بأمنه واستقراره ومستقبله."دي أجمل أغنية سمعتها في حياتي ...لأني مش فاهمها و لا حفهمها لأني مش عايز و لا ناوي أفهمها
مستقبل الأوطان مين يابا .. شوف الانجاز اللي انت مش هتفهمه "أنا جيت شقة فى زمن لو جبت شقة يقولوا تهييس .. طب مهر؟ لأة يا اخواننا هو التشطيب رخيص! "
"كما أننا ماضون فى الإصلاح الاقتصادى متطلعين لانطلاقة جديدة لاقتصادنا مع تراجع أزمة الركود العالمى، نسعى للمزيد من الاستثمارات والصادرات والمزيد من فرص العمل، نعاود تحقيق ما حققناه من معدلات النمو المرتفعة قبل الأزمة، نستعيد زمام المبادرة فى محاصرة الفقر والبطالة، وتواصل تطوير ما يقدم للمواطنين من خدمات."ماضون : من الفعل مضى ، و مضى أي راح و خلاص .. احنا بندور ع التجديد و خايفين نتلسع منه لكن عايزين نجربه .. لو غلط عايزين نجربه ..."سقط عن أمتي الخطأ و النسيان" ... نعتبره خطأ بقى و نجربه طالما ما نعرفش انه خطأ
شكلنا هننطلق فعلاً ..."تاكس ....عابدين يا اسطى"
"نمضى فى ذلك متمسكين بتوسيع قاعدة العدل الاجتماعى، مدركين للاحتياجات الحقيقية لأغلبية أبناء الشعب من الفقراء والبسطاء، وتطلعهم المشروع للمستقبل الأفضل والعيش الكريم، ولمن يقف إلى جانبهم فى مواجهة غلاء الأسعار وأعباء الحياة."متمسكين دي هي اللي بتخوفنا منك ... و انتم يومكم بسنة ...
مدركين دي فيها فشر شوية ... حتى لو شايفين ده - و ده شئ مستبعد- .. استحاله تدركوه ..لأنك عشان تدركه لازم تعيشه
و اصدق ازي انك بتمضي ؟ " ما بقاش عندي ثقة في حد م اللي أنا شفته في حياتي "
في النهاية هقول للاتنين
لابو الليف .... "لو قلت ما تخافشي"
لمبارك ....... " لو خفت ما تقولشي"
و احب أقول لهم هما الاتنين ... احنا ما بنتاكلش بالساهل
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
و ده الجزء الأول .. أصل دماغي حلفت طلاق بالتلاته لتسيبني لو ما بطلتش فعص (فحص) فيها بحثاً عن معلومات أخرى تساعدني في بوستي ( مقالتي يعني )
