النهاردة عيد ميلاد كذبة إبريل
قصدي النهاردة عيد ميلاد ليس فقيرا من يحب ، الموافق لكذبة إبريل
مش مهم
قصدي مش مهم اني أكثر في الكلام
عن كذبة إبريل طبعا مش عن عيد الميلاد القومي
عايزين توقعوني في غلط و لا ايه ؟ ......
كنت ماشي النهاردة الصبح و بفكر في الكشكول اللي ضاع مني ..مليان بلاوي .. محاضرات يعني .. يا ترى ضاع فين ؟ .. نسيته فين ؟ .. مين اللي ماشي جنبي ده .. شكلي كده اتجننت بعد فترة من التفكير المتواصل في الكشكول .. لدرجة اني و أنا بكلم والدي قلتله نعم يا كشـ .. طبعاً ما كملتهاش .. يا ترى انت فين يا حبيبي .. فين يا كشكولي العزيز .. ده فيه اعترافات توديني ورا الشمس
ألحق نفسي هنا بقى و انفي و اشجب و استنكر كل ما جاء في الكشكول جملة و تفصيلاً
-أولاً أنا ضد البرادعي : البرادعي ده كان في وكالة الطاقة الذرية ، يعني هيعمل ايه في مصر يعني ؟ ... هيحاول يوفق و يقلل مخاطر الاشعاع بين الناس و بعضها .. هيتدخل و يمنع الانفجارات بين الأحزاب و بعضها ... الراجل ده جاي يهدي النفوس (طبعاً ) ..
-قال ناوي ابقى رئيس جمهورية قال : دي شطحات فلسفية مش ناوي أوصل لها لحد ما اموت ... هي ناقصة قرف .. قصدي مسئولية
ربنا يـ .... بارك في المسئولين و يـ ..هدهم ..... ( خطأ مطبعي ... طبعاً يهديهم ... عارف انهم مش ضالين ... هداية على هداية )
الحياة حلوة بس نستنى : أنا عارف احنا متصربعين كده ليه ؟ ... ده احنا شباب صايع صحيح .. ايه الحكاية ...مش عارفين نقدر المسئولية ...مش عارفين نفضل ندور و ندور على مسئولية بدل ما نبقى ( عطلانين ) ...
الأكل زي البنزين ... و كلنا عارفين ان البنزين خلاص ناوي يغلى و يسيب مصر و يحترف بره .... و الأكل كمان
لا يا افندم ...ده ناوي يحترف جوه
دماغي دي دماغ فار في متاهة ... بس هي فين الجبنة اللي توصلني
أكيد سيادتك رحت تجيبها و يمكن .... يمكن .... لربما .... ترجع
بعد 100 سنة .... سيادتك هتكون لسه الرئيس ... يباركلنا فيك و يباركلك فينا
ربنا ياخدنا و يخلي سيادتك
أنا بحبك يا فراولة .... أنا سمعت انها هتغلى عشان كده عايز أغيرها و اخليها .... مانجا
أنا مش ناوي أحترف في البرازيل
بس ناوي اتنفي هناك
كفاية كده عشان مش عارف اناقض ضميري و اكذب اكثر من كده
أنا بخااااااااااااااااااف
من ربنا
ده أنا عبيط قوي
حد ينسى ان الواد اللي جانبه ده يبقى أبو حميد
----
نظرت ليديه متحديا و قلت
-يا حرامي ... هات الكشكول
يرد علي و كأنني أبله
-ده انت اللي مديهولي
قلت لنفسي .:
-هما عايزينك تفتكر كده .. انك فرطت في نفسك بمزاجك
استدركت قائلاً لنفسي أيضاً .:
- في كشكولي يا حيوان مش نفسي فرطت في كشكولي
على العموم أنا كذاب
و الجملة اللي فاتت دي ينطبق عليها معنى كذبة إبريل
-------
يللا حالاً بالاً هنوا أبو الفصاد ....عيد ميلاده الليلة الليلة أجمل الأعياد ... من غير جاتوه و لا تورتات .
الحقوووووووووووووووووووها دي جايبة فول و طعمية
3 التعليقات:
هههههههههههههههههههههههه
ايه ده كله
ايه ابوحميد انت لسه صغير وفراوله عيزاك
ههههههه انت مش قد التسقيف على القفا
وطبعا اسمى مكتوب
متحرمش منك ابداااااااااااااااااا
ربنا يكرمك ويسعدك ويفرحنى بيك انت وفراوله ههههه وبنجاحك
تقصد ايه بقى يكدبه ابريل دى
هه
ربنا يسعدك يا اطيب رئيس ممكن يكبس على نفسنا
تقصد مين ههههههههههههههههههههههه
لا الاجازة مفيدة جدا
ادع لى انا كمان بأجازة وارتب دماغى كده
ياكاره البرادعى:)
ليس فقيراً من يحب :
مش الفراولة حمضت ... بالسلامة
قالتلي قبل كده "عشان ما تتسكعش على قفاك" ...قلتلها " الرب واحد و العمر واحد ... و كمان القفا واحد"
آسف ع التهييس الرسمي
------------------
حفيدة عرابي :
صدقيني هتلاقي حاجات كتير اتصلحت بترتيب دماغك ده
انا اعتمدت على ابراهيم الفقي الفترة دي
د/ابراهيم بيعتمد على القرآن و الأحاديث و أقوال المشاهير و يستشهد منها ... ده غير العلم اللي هو متخصص فيه ...يبقى خدت العيش من خبازه فعلاً
انا مش هقول حياتي اتغيرت اليومين اللي فاتوا دول
لكن هقول انا بدأت أتغير و احس و اعرف و افهم حاجات كتير ما شفتهاش و لا فهمتها و لا عرفتها قبل كده
بلا برادعي بلا مبارك
هي ناقصة بلاوي من وراهم
أنا عمال أقول في سري
ياكش تولع
ربنا يرزقك براحة البال
-----
إرسال تعليق