فهل تفعل كما قلت عنك سابقا ... وتنهض من وسط الرماد كالعنقاء مرة اخري ... وقد استفدت من هزائمك وانكساراتك ... ام تخيب املي فيك ؟
( أتذكر الآن ما قلته عن طرق التحكم في المفاعلات النووية و عن قضبان الكادميوم ... فقط الآن اكتشفت أنه ليس بمفاعل .. هو فقط مخزن .. بغبغان بيقول كلام .. سايب لسانه يقول ... كانت غيبوبة لسه عايشها .. عارف انك زعلان مني .. مكسوف أصالحك ..لا لا مكسوف ايه ...أنا خايف أصالحك ...و مع ذلك هفكرك بالجملة دي في الرسالة اللي بقرأها مراراً و تكراراً )
اعدك ستجدني دائما بجانبك ... مهما حصل ... صديقا عزيز .. واخا اكبر ... مستعد لفعل اي شئ فقط بشرط ان اري الصورة الجذابة الجميلة الصنديدة التي كنت عليها
( للي عارف نفسه )
كنت في مطار .. مش عارف في أي مطار .. في مصر طبعاً .. المهم .. كنت مسافر السعودية على ما أذكر -ما هو حلم بقى- .. خلصت الأوراق و كله تمام و جواز سفري في ايدي و شنطتي على كتفي و قلمي في جيبي و سندوتشي في (بوقي) و شرابي في جزمتي و كله تمام .. قد ايه كنت فرحان بالسفرية دي .. كأنه كان حلم حياتي و بيتحقق .. بيني و بينكم فرحت لدرجة "التهييس" .. حسيت اني ناسي شئ مهم .. ايه يا ترى ؟؟ .. مش فاكر .
خلاص مش مهم نسيت ايه المهم اني خلاص داخل على صالة "المسافرين" -على حسب تسميتي - .. الصالة اللي بيقعدوا فيها يستنوا فيها دورهم في ركوب الطيارة .. ما علينا .. قال يعني أنا ركبت مرجيحة قبل كده فما بالكوا بطيارة .. أول ما دخلت على يميني و يساري ناس .. ناس كتير .. كتير جدا جدا .. و عربيات .. كتير برضه - ما تسألونيش إزاي أنا بحلم لسه ما صحيتش- ..
خطوتين بالضبط و الثالثة خبطت في بنت .. من غير ما أقصد و الله .. نظرت لي بغضب؟ .. بدهشة؟ .. بعتاب؟ .. بقرف؟ .. مش عارف أو مش فاكر .. كل اللي فاكره اني وضعت الشنطة في صندوق عربيتها و رحت أجيب حاجة .. مشيت بنت الـ(....راجل الـ...طيب ) .. المشكلة بقى ان الباسبور في الشنطة .. بقدرة قادر كده بعد ما كان في إيدي بقى في الشنطة .. فكرة واحدة و فرصة واحد .. وقفت على ترابيزة قاعد عليها اتنين بيشيشوا (جوه المطار) .. و من وسط الدخان طلع صوتي : انتي فين يا آنسة وجدي .. أبوها كان بينادي عليها يقولها كده .. أنا مالي ..
-آنسة وجدي ،انتي فين يا آنسة وجدي ..
( صوت الناس في المقابل بيعلى و يعلى و يعلى و يعلى .. و صوتي يطاطي يطاطي يطاطي )
-انتي يا آنسة وجدي .. يخربيتك ما تردي عليا الباسبور بتاعي معاكي في الشنطة بتاعتي
(صوت الناس لسه بيعلى كأنهم قاصدين يشوشروا عليا)
ما جاش في بالي لا ضباط أمن و لا نيلة .. خلاص .. أملي ضاع
(شوشرة فوق النيل لسه شغالة .. )
أعمل ايه دلوقتي ؟ .. حلم عمرك ضاع يابو صلاح يا ابن الناظر .. الباسبور مع الآنسة وجدي و ما ينفعش أروح من غيره طبعاً .. أعمل ايه .. أعمل ايه .. خطرت في دماغي فكرة جهنمية .. جدا .. هي إني .. ما تستغربوش .. أصرخ .. قمت صرخت في الناس كلها عايزها تسكت .. بدل ما بنادي ع الآنسة وجدي بقيت بحاول أسكت الناس .. و كان تحدي سافر .. كل ما صوتي يعلى صوتهم يعلى .. كأنها معركة.. واحد قام من وسطهم بيضحك .. بيضحكلي .. قام يساعدني أشخط فيهم .. شوية بشوية .. صوتنا راح أنا و هو .. بس هو أمله ما راحش .. أنا اللي أملي راح
راح
راح
خلاص فقدت الأمل .. و فكرتي الجهنمية "الصراخ" .. اتحولت لفكرة جحيمية تانية و هي "البكاء" .. و رغم استغرابي لكل الأحداث دي إلا إني صدقتها .. ومع أول دمعة نزلت من عيني غرقت .. أنا غرقت .. و صحيت .. و افتكرت .. يخربيت مطنك يا محمد .. ده أنا نسيت شئ مهم جداً جداً جداً ...شئ كان هيغير أحداث الفيلم -قصدي الحلم تغيراً جذرياً
ألا و هو
الشنطة كانت متعلقة على كتفي طوال الوقت .. من شدة تفكيري في حجم المأساة و عواقبها و نتايجها نسيت أهم شئ .. نسيت "المزيل" .. مزيل الهموم .. دلوقتي و بعد الحلم ده عرفت معنى مقولة هامة جداً ..
"الرجال تعاقب بخطاياها... لا بسببها"
الحل كان في إيدي طول الوقت و عقلي ...خبى ...و خبى ايدي ...خبى كل ... مين يا ترى اللي كان بيساعدني و حاول يخلي صوتي أعلى ؟ ...مين اللي وقف جنبي ؟
هو عارف نفسه ...
السؤال بقى : كل ده كان غباء .. و لا أمر إعتيادي ؟
8 التعليقات:
ربنا يوقفلك ولاد الحلال دايما :)
دور بس جواك كويس وان شاء الله هتلاقي حاجات تفرحك :)
ايه يا واد يا محمد
انا عماله اقرى وحسه ان عقلى مشوش
او انت عقلك مشوش المهم ان فى تشويش فى الموضوع
اهدى كده وفهمنى الهى يسترك هو فيه ايه ومالك اليومين دول
ربنا يخليكي يا د/أليس
بس بجد كل ما بدور على حاجة حلوة جوايا ...بتطلعلي كأنها عفريت بعد ما أنام .
:)
-------------------------------
ليس فقيراً من يحب ...
بالجعضيض بتاعك ده و العدس و السمك اللي خلاص خلص و عملتي لنا أزمه فيه ... و البوست بتاع الحقووووني اللي يا ريتنا ما لحقنا عشان ما نتصدمش بطبق الفول و الطعمية و الذي منه .
أنا فعلاً عقلي مشوش
--
بسبب ايه؟ ..مش بسبب الدراسة و الحمد لله ... تمام يعني جايب جيد التيرم الأول ...
لكن بسبب ضغط الدراسة
--
مش بسبب البيت عندي و اللي بيحصل فيه أهو تمام الحمد لله ....
لكن بسبب اللي أنا حاسه بسبب البيت
--
مش بسبب العيال أصحابي ... عيال تمام و زي الفل ..و رجالة و ..جدعان..و بحترمهم جدا
لكن بسبب احساسي اني مختلف عنهم ... مختلف بمعنى غريب
--
مش بسبب ان فراولة تعباني ... لأنه كفاية اني بشوفها في الكلية ببسمتها دي اللي مش هنساها لحظة
لكن بسبب اني شاكك في المستقبل ...و انه ممكن ما يوفرليش اللي أكمل بيه المشوار
--
مش بسبب الأفكار اللي في دماغي اللي بتودي و اللي بتجيب
لكن بسبب تصادمها
--
مش بسبب انخراطي في المجتمع ...
لكن بسبب رؤية الناس لده انه ...انعزال
--
مش بسبب اني زعلت أشخاص مهمين في حياتي مني
لكن بسبب اني خايف انهم يفضلوا زعلانين ..او يقل تقييمي في نظرهم
--
مش بسبب عدم إنجازي حاجة مهمة لحد دلوقتي
لكن بسبب الشوكة اللي واقفة في زوري بسبب الموضوع ده
--
مش بسبب الفول و الطعمية و العيش
لكن بسبب الملح الزيادة اللي -دايما- في الفول ، و الزيت اللي بيشر طعمية ، و العيش ابو زلط
--
مش بسبب ان الكهرباء قطعت تلات مرات و انا بكتب التعليق ده
لكن بسبب اني نسيت نص الكلام اللي ما كنتش لسه كتبته
مش عارف برضه ... حاسس ان لسه عقلي مشوش ...
سمعت ان عندك علاج لتشوش البشرة -غير الجعضيض- ألقيش عندك ؟
كفاية انكم بتدعولي و ده يكفيني من الدنيا دي
دعواتك بقى لفراولة يفرج عنها الهم
وانت تحط مستقبلك وحلمك في شنطه واحده متعرفهاش ليه ؟؟
عموما اكيد في حد هيساعدك تخف ثقه بالناس بالطريقه دي ويخفف همك
تحياتي
عادي جدا في هذا الزمن
فتاة من الصعيد :
الشنطة اللي ما اعرفهاش دي هي الفرصة
و الفرصة دايماً بتكون شنطة مغلقة و ما نعرفهاش الا لما نستغلها
متشكر ع الزيارة الجميلة دي
-----------------------------
أ/محمد بدر :
أشكرك على الثناء اللطيف و لي الشرف أن نصبح أصدقاء
رايح أشوف أبو الليف عمل ايه تاني
------------------
Sharm :
تشرفت بزيارة حضرتك جداً جداً
عادي جداً في هذا الزمن
ان اللي صوته أعلى يكسب الجولة
الصديق الذي سيظل عزيزا للابد ... واخا دائما
اظن انه دماغ .. وليس بسطرمة
واعتقد ان ذلك الشخص - الذي يعرف نفسه - سيظل كما هو .. حيث لم يجدً ما يستدعي التغيير ..
الف مليون مبروك علي "الجيد" في التيرم الاول ... وان كنت اتمني ان تكون بداية ... وان يكون ما هو قادم .. اكثر جمالا
انت عليك غرامة لانك لم تعلق علي اخر بوست عندي " اسبرسو وفروت سويسرول " ...فانا ادخل كل مرة لمدونتي باحثا عن تعليقك الذي تأخر كثيرا .. جدا
اتركك في رعاية الله وامنه ... والسلام عليكم
أنا الوحيد اللي عارف و متأكد انه بسطرمة
و الله يبارك فيك
"واعتقد ان ذلك الشخص - الذي يعرف نفسه - سيظل كما هو .. حيث لم يجدً ما يستدعي التغيير .."
لأجل ذلك سيظل ذلك الشخص - الذي يعرف نفسه - أهم و أعز أصدقائي
و ان شاء الله أعرفك عليه ..ههههه
و بعدين في الغرامات دي ؟ ... هتبقى انت و عم بقلظ غالي
كده مش حينفع يا بشمهندس
:]
إرسال تعليق