ما كنتش عايز أكتب عشان إيدي مخاصماني .. و اضطريت أكتب بقدمي ... عملية صعبة جدا الكتابة بالقدم ... اوعوا تجربوا ده في البيت ... أنا مش بستخدم كيبورد عادي .. ده كيبورد من أبو رجلة ... واحد كتب يافطة و نسي يحط "ي" بعد الـ "س" ... مش بقولكوا الكتابة بالقدم مزعجة و مقرفة و ممتعة ... أنا مش هقعد أوصف حالتي و انا بكتب إزاي عشان أنا عارف انكم ما يهمكمش تعرفوا أنا بكتب إزاي و الشاشة مضلمة .. عادي على فكرة .. أنا واد كتيب و مش لازم أراجع الكلام ... و متهيألي ما يهمكمش كمان تعرفوا اني بكتب في ظلام دامس ... علشان الوحي يفضل موجود أصله بيخاف من النور بقدر ما كنت بخاف من الضلمة ... ما علينا .. من وجع الدماغ اللي مخليني أكتب نسيت أنا كنت هكتب ايه .. أقول ما علينا تاني ؟ ... لا يجوز قانوناً .. ده يبقى اسمه تجاهل و في مصر ما ينفعش تتجاهل .. حتى لو انت مش فاهم في حاجة ما ينفعش تتجاهل .... لازم يكون لك رأي حتى لو انت ما تعرفش كيلو اللحمة بيتباع "فين"... ما انت عايش في مصر ... يبقى أكيد عارف كل حاجة فيها ... بالإضافة لشوارعها و مبانيها و دكاكينها و حواريها ... أكيد انت عارف في السياسة و الرأي العم و الصراع و الكرنك و ..الذي منه !
أنا ما كنتش هكتب عن كده خالص ... أنا كنت هكتب عن حلم .. تاني! ... حلم ان كل اللي حواليا من مدونين بتابعهم يرجعوا .. يرجعوا بغزارة .. يكتبوا كتير ... عايزين نشوفهم من كلامهم .."تكلموا حتى أراكم" .. بالصدفة كده عن عمد لقيت مدونة جميلة و عسولة و اسمها فضفضة .. و منها وصلت لمقال اسمه "30 يوماً من التدوين" ... أيوه 30 يوم ..متواصلين .. على التوالي ..أنا عارف انك على الأقل ممكن تلاقي تلاتين واحد بمقدار شخص لكل يوم ..بيشتكوا من كلامك الكتير و رغيك عمال على بطال ... بس على الأقل هتتكلم .. هتتكلم براحتك ... هتتكلم من القلب .. هتتكلم ببلاش ..
أظن إن أسباب الانقطاع 4 :
- "مش لاقي حاجة أكتبها " : و الحل في أول صورة ... المفروض تكتب موضوع و تقول " مش لاقي حاجة أكتبها .. بغض النظر طبعاً عن أن " السبب في كونك مملاً أنك تقول كل شئ" ... لأنك ما قلتش كل شئ .. و دليلي انك ما قلتش انت أكلت ايه امبارح ... أو انك ما قلتش انت بتكتب برجلك و الشاشة مقفولة و النور مقطوع ! .
- "مش حاسس ان الناس يهمها كلامي" : و الحل انك تقعد مع نفسك كده و تفكر .. مش كلامك ده انت مهتم بيه ؟ ... و انت واحد من الناس ؟ ... يبقى بعض "الأنانيس " يهمهم كلامك و انت منهم -لو ما كنتش كلهم - .
- "حالتي النفسية مش مساعداني" : بص يا ريس/ة ... هتبكي هنبكي عليك .. هتضحك برضه هنضحك عليك .
- " و انت مالك انت ... حياتي و انا حر فيها " : مصر محتاجة لك يا أدهم ... انت ملك مصر .. مصر دي أمك .. انت "اتسميت" من نيلها العظيم ... أجدادك الفراعنة الله يرحمهم مطرح ما غاروا ... ابني مصر ... عيش لمصر ... عشان تموت في مصر ... و تندفن في السودان .
حاسس اني هطول عليكم
هسيب الحلم للمرة الجاية
حلمي اللي كان نصه
انكم ترجعوا كلكم
عشان بجد
أنا بحترمكم و بحبكم
آه و الله
بكآبتكم و ظرفكم
بخفة دمكم
و طيبة قلبكم
ارجعولنا بقى
زي ما كنتم
كفاية لاحسن أطول عليكم
صعبان عليا أنهي البوست بالكلمتين دول بس
خدوا الصورة دي مني هدية ... عشان تعرفوا أنا بعزكم و اني بفضلكم عن نفسي إزاي ...
يا نهار أبيض
كنت هنسى روابط مهمة جدا
رابط مدونة فضفضة ( منها وصلت لمدونة جيرالدين .. نسيتوا! .. 30 يوم تدوين )
رابط مدونة جيرالدين ( و سلمولي عليكم بقى .. )
6 التعليقات:
لالالالالا ..دي مش بتفكر فيك ... دي ضاربة غدوة تقيلة جدااااا ... وقاعدة بتريح بعدها .. هههههههه
المشكلة انني كنت اظن اني الوحيد الذي غاب عن التدوين في المرحلة السابقة - نظرا لاشياء كثيرة مررت بها - .. ولكن لدهشتي وجدت كثيرا ممن كنت اتابعهم سابقا .. انقطعوا عن التدوين .. ويمكن كمثال قريب جدا صديقنا المشترك " فاروق " - يوميات طالب -
الواضح ان هناك طاقة سلبية ما تسيطر علي الوضع حاليا تقوم بامتصاص قدرة الناس علي الحلم .. وعلي الرغبة في ان يصبح غدا افضل مما نحن فيه
اه صحيح ... انت رجعت للاحلام تاااااني ؟؟؟ كده مش هنخلص ... بس حلمك انا حرقته .. لما رجعت للتدوين قبل ما تحلم انت بده
كمان في حاجة .. متتقمصش دور المدرس تاني معايا ... عشان انا شرير .. وطلعت المدرس بتاعك غلطان ومش بيقرأ كويس - الرد ستجده هناك علي مدرسك المزعوم - ... شرير بقي .. تعمل ايه ؟؟؟
ابقي ابعتلي ايميلك .. عاوز اكلمك بشدة .. واحكي معاك .. لانك اوحشتني كثيرااااااا جداااااااا ... وبلاش مرواغة .. اصل هوصلك هوصلك ... " شرير بقي زي ما قلتلك "
هههههههههه
طيب انا حاولت اعمل كده ماقدرتش...صعب اكتب كل يوم :) ..
ممكن اعرف مين اللي بيبيع الكيبوردات ام رجله دي...عايزه واحد ..
تحياتي
أنا مدرس فاشل أعترف بذلك
الواحد هيحرم يقرب من مدونتك و هو نايم تاني
مش بقولك حتعلق عندك
حاسس كده
أو تقدر تقول حلمت بكده
---------------------------------
فتاة من الصعيد :
حبعتلك واحد ان شاء الله
أنا بقى هجرب أكتب كل يوم
و اشوف هقدر على التحدي ده و لا لأ
الأخ الفاضل :: رجل تحت الصفر ::
أسعد الله صباحك بكل خير
مدونة متميزة
ومدون أكثر تميزًا ..
اعجبتني النقاط الأربعة والتي تتحدث عن أسباب الانقطاع التدويني
تحياتي
بجد الكلامك اللي انت كاتبه دة احساس جميل ورائع منك للمدونين
وفعلا هناك اسباب كثيرة جدا للانقطاع عن الكتابة بس لا اعتقد ان منها انه ليس هناك شيء لان يومنا بالتاكيد مليء بتفاصيل كثيرة جدا من الممكن ان نكتب عنها بس اقول ايه بقى
الدنيا تلاهي
الأستاذ الفاضل محمد سعد القويري :
سأغش تعليقك و أقول ما أسعدني فعلاً هو تواجدك الكريم
و أسعدني أكثر تعليقك الجميل
و أفزعني إطراءك لي
أنا متميز ؟!
----------------------
رشا عبيد :
منتظرك بعد ما تقومي بالسلامة
بجد عايزين نفرح معاكي بقى
ما تحرميناش من زقزقة عصافيرك كلما واتتك الفرصة
إرسال تعليق