- صباح الإبداع و التهييس الشعبي ..
- كالعادة بكتب لكم في انصاص الليالي ...
- اشمعنى أنيس منصور يعني ؟! ...
لسه صاحي عندك مانع ؟ .. بحسب ... قوللي بقى ... عملت ايه النهاردة ... ما عملتش غير الروتين ؟! ... ايه الروتين ده بقى سعادتك ... آه ... فهمت ... و الله فهمت ... خلاص بقى هو أنا غبي للدرجة دي ؟ ... يا سيدنا فهمت ...يا مولانا فهمت ... أبو أم الروتين على أبو اللي عايز يفهمه ... قال روتين قال .. الروتين هو "بروتين" بدون فيتامين "ب" ... شئ كده ممل .. تقوم تفتح الكتاب من دول -ده أنا يعني- و عمال نازل دح .. و في الآخر لو سألت نفسك انت فهمت حاجة أقوللي لأ .
بكتب لكم دلوقتي و أنا متراقب .. شايفك ياللي مستغرب .. آه متراقب .. و عندي الدليل .. بيراقبونا كلنا .. بكره اعتصام و بلاوي سودا .. أنا إيه اللي خلاني اقعد في مصر دي .. كلها اعتصامات و اضطرابات ... المشكلة بلسان أحد الشباب " احنا لقينا الإضرابات بتجيبلنا حقوقنا قمنا أضربنا " ... و عشان كده كانت دعوة عامة و اضراب كبير جدا للعمال ... اعتصام يعني ... مش عارف يعني ايه اعتصام ؟! .. أومال أنا اللي أعرف ... عادي ممكن تسأل عم جوجل اللي في الصفحة الرئيسية .
الاعتصام ده بيطالبوا فيه بحد أدنى للأجور "1200 جنيه " لكل عامل و موظف في الدولة .. تنفيذاً لحكم قضائي "رقم 21606 لسنة 63ق، يُلزِم رئيس الجمهورية و رئيس الوزراء و المجلس القومي للأجور بوضع حد أدنى عادل للأجور في المجتمع"...فاكرينها سايبة سيادتهم ... نسيوا ان البلد فيها حكومة .. و الحكومة وراها بلاوي متلتلة غير الشعب النشفان ده ... شعب عايز يتحنط صحيح .
ده موقع الاعتصام لو عايزين تفاصيل أكثر ... (مَعًا لإنفاذِ الحُكمِ القَضائِيِّ المُلزِمِ رَئيسَ الجُمهورِيَّةِ و رَئيسَ الوُزَراءِ بِوَضعِ حَدٍ أَدنىٰ عادِلٍ للأجورِ) ... بس خدوا بالكم "الحكومة مالهاش دراع عشان تتلوي منه " .
سيبوكوا بقى من الكلام اللي فات ده و نتنقل لموضوع تاني ... موضوع شخصي بيا أنا .. أنا زهقت .. هم بيعملوا فينا كده ليه ؟! .. هو عشان مصر أم الدنيا كل الدنيا تعمل نفسها أبو أم الدنيا ؟ .. في لبنان مثلوا بجثة شاب مصري بعد ما قتلوه .. قرية كاملة .. يتعمل فيهم ايه دول من رأيك .. موقفك يكون ايه مع دول لو كنت رئيس جمهورية ؟ .. أنا عن نفسي متهور .. هعلنها حرب عليهم .. هنقول طب مش من الأولى اننا نحارب البهايم اللي اسمهم اسرائيل ؟ ... شكلنا كده هنحارب الدنيا كلها ... آه و الله .. ده جزاتنا " عشان كنا رجالة ووقفنا وقفة رجالة" .. عشان بنتدخل في شئون الكل و نساعدهم و ناسيين ان ده مش دورنا .. جمال عبد الناصر بقى زعيم الأمة العربية .. ساعدهم كلهم .. و ساعدونا كلهم .. لكن هل الوقت جاء انهم يتخلوا عننا و يوصل الكره في قلبهم انهم يقارنونا بالـ (..) .. كفاية كده عشان تعبت .. تعبت بجد من الناس دي .
المجد للشيطان معبود الرياح من قال لا في وجه من قالوا نعم
( أمل دنقل )
أخ ... نسيت تاني ... نسيت حاجة مهمة جداً .. حاجة استحالة انساها ... امبارح زي ما الكل عارف كان عيد العمال .. آه .. صباح الأيدي الناعمة .. فعلاً ..الفيلم خلص من ميلودي أفلام لقيته في النيل سينما .. ما انا صايع بقى عمال اتفرج على التليفزيون و فاضي ما وراييش حاجة ..يعني العمال ياخدوا أجازة و انا ما اخدش ؟ .. ده كان امبارح و خلاص خلصت الأجازة على خير ... النهاردة ( 2 مايو ) ده عيد من نوع تاني ..نوع خاص ..عيد ميلاد واحد من العمال .. الميعاد ده جاء و فق اختياره هو أكيد .. يحتفل بعيد العمال زمايله الأول و بعدين يحتفلوا هما بيه ... أنا بقى امكانياتي محدودة و لا فيش تورتات و لا جاتوهات و لا شويبس و لا حاجة ... بس عندي الأهم ... " كل سنة و حضرتك طيب " ... لؤلؤة سوداء .. انت فعلاً لؤلؤة سوداء .. و من غير سبب .. انت سبب كده لوحدك .. انت متميز .. انت "مش مستني واحد زيي يقول كده" علشان انت فعلاً -برأي خبراء- متميز .. أشكرك على إدراجاتك المميزة كما عودتنا .. و إلى مزيد .
7 التعليقات:
تفتكر فيه فايدة من الاعتصام دة
مش قادرة اكون متفائلة
ولا حياه لمن تنادى ويبقى الحال على ما هو عليه
ولعى المتضرر اللجوء لله العلى القدير
اول مرة ادخل عندك وان شاء الله مش هاتكون الاخيرة
بالنسبه للاعتصام...فربنا ييسر ويوافقوا ع الطلبات..
بالنسبه للبنان...فالفكره ان الولد نصه لبناني وامه خدته تربيه هناك...بمعنى ان الجريمه موش ضد المصريين..
الجريمه بتدل على نقص حااااد في نفوذ الأمن بلبنان للأسف قعدوا يتفرجوا..
ومهما كانت تهمه الولد برضو القصاص مايكنش غير انساني وهمجي كده..
لما نشوف الخارجيه هتعمل ايه
كل سنه وصديقك بخير
استمر...بوستاتك جميله :) ..
تحياتي
مايو شهر مواليده مميزين :) حتي وان اتولد فيه اعتصام
كل سنة وهو طيب وبخير وانت معاه
مش عندك امتحانات بردة ولا شهر مايو دا فاتح علي مصايف علي طول؟
انا عندي اقتراح افيد بما انك دخلت تحدي ال 30 يوم تدوين
انت تذاكر طول اليوم وتيجي بليل تدون اللي ذاكرته وملكش دعوة محدش هيعترض طالما بتذاكر
اهو تستفيد من وقتك و تورينا التحدي دا هتطلع منه بايه :)
30 يوم مذاكرة علشان خاطر ربنا :)
ههههههههههههههههههههههههه
وهو انيس منصور احسن منك فى ايه يا ابو صلاح
اكتب فى انصاص الليالى براحتك بس ذاكر
كل سنه واحنا معتصمين ومخنوقين وقرفانين
تفتكر الحياه كان هيبقى ليها معنى من غير ما نتقرف فى
عيشتنا
وكل سنه وواحد من العمال بالف خير ومناضل دايما
وكل سنه وكل المصريين متبهدلين وطالع عينهم فى كل مكان
وانت ركككككككز وزااااااااااكر وبعدين نشوف بقيت الحاجات دى
ـــــــــــــــــــــــــــــ
سبهللة :
مش هقول الشرف ليا انك زرتيني و مش هقول نورتي المدونة بزيارتك و لا هقول ما تحرميناش من زيارتك
أنا حقول ان كل اللي مش قلتهوش أمر بديهي و مُسلم بيه
فعلاً ... على المتضرر اللجوء للعلي القدير
فـ "هو أرحم الراحمين "
ـــــــــــــــــــــــــــــ
فتاة من الصعيد :
"الولد نصه لبناني وامه خدته تربيه هناك...بمعنى ان الجريمه موش ضد المصريين."
بس الجريمة مستفزة فعلاً ، و مشاعرنا كانت هتتحرك حتى لو مالناش دعوة بالقتيل .. الفكرة بس اننا "ما صدقنا" لاقينا ان الواد مصري ... و بعدين ده كل اللي بنطلعه مشاعر ..ما طلعناش مظاهرات بسببه و لا حاجة
"ومهما كانت تهمه الولد برضو القصاص مايكنش غير انساني وهمجي كده"
هو ده الكلام المظبوط
على فكرة ...بوستاتك أجمل
:)
ـــــــــــــــــــــــــــــ
د/ أليس في بلاد العجائب :
س: مش عندك امتحانات بردة ولا شهر مايو دا فاتح علي مصايف علي طول؟
ج: بقالي 30 سنة ما صيفتش ... فكرة حلوة ان الواحد يصيف و هو بيذاكر .. مش كده و لا ايه ؟
و فكره جميلة جدا جدا اني آجي "أسمعلكم" ... أو ألخصلكم اللي ذاكرته لكن تنفيذها صعب
أولاً : لأني بخرج نفسي من مادة المذاكرة مش من موود ( مزاج ) المذاكرة ... يعني ما ينفعش أسيب خوفو في الكتاب عشان أجيبه هنا ... و الهيروغليفي بقى ده الحاجة اللي عايز أعملها على المدى الطويل هنا في المدونة .. و الهيروغليفي مادة ممتدة سنة و هقعد - غصب عني - أتعلم فيها لغاية ما اموت .
ثانياً : أنا بكتب هنا عشان أخرج أشياء بتدور في دماغي و انا بذاكر و ابقى ضربت 10 عصافير بحجر واحد .. صفيت ذهني عشان أركز و انا بذاكر .. كتبت ... عرفت مدى اهتمامكم
ـــــــــــــــــــــــــــــ
ليس فقيراً من يحب :
فعلاً .. الحياة ما كانش هيبقى ليها أي معنى من غير قرف أو عدس أو جعضيض !
:)
هركز ... هذاكر ... هنط م البلكونة
ـــــــــــــــــــــــــــــ
السلام عليكم رجل تحت الصفر
أشكرك على دماثه خلقك
فقد بالغت وما أنا إلا واحد من العمال
ولقد منعنى الخجل من الرد الفورى وشكرك على التهنئه والهديه
وهديتك على العين والرأس جميله فعلاً
الؤلؤه السوداء مره واحده الله يكرمك ويعزك
وأشكر كل من هنأنى ضمن تعليقه على هذه التدوينه
وعلى فكره النت عاد للأنتظام وسأتابع ال30 يوم تدوين من الأول وجميع المدونات الحبيبه لأنى كنت بتابع من سايبر
أشكرك وأتمنى لك التوفيق
ودمت بخير حال وبوعى
أستاذي العزيز :
آسف على لخبطتك لكن أنا مكنت الإشراف على التعليقات في المواضيع القديمة علشان التعليقات ما تمرش علي دون رد
.. لم أبالغ .. أنت واحد من العمال فعلاً .. مجرد واحد من العمال، و لكن أنت أيضاً مجرد لؤلؤة سوداء .. و ما أندرها ! ... ايه المانع ؟!
أسعدني جداً إنتظام النت عند حضرتك و أنا في انتظار تدويناتك القادمة ...
دمت بالسعادة و الخير و الوعي
:)
إرسال تعليق