أي كلام

ليس إبداعاً و لكنها ...عبقرية

أكتب بأي اللغتين ؟ ... العربية أم المصرية ؟ .. لا عليّ .. سأتكلم بالمصرية .. إزيكم ؟ ..واحشيني جداً .. أنا جاي النهاردة أفضفض معاكم .. هكتب كده و خلاص و افرغ دماغي من الكلام ده .. استميحكم عذراً - قصدي ما تآخذونيش - هرغي معاكم شوية ... خير اللهم اجعله خير ما حلمتش النهارده .. لكن عرفت معلومة مثيرة للاهتمام ... معلومة مهمة لكن شايفها عملالي قلق في دماغي ..

انا كتبت كتير ..و المشكلة اني شايف اني كتبت حاجات "متخلفة" .. حاجات أنا لما قرأتها دلوقتي لقيتني بشتم نفسي .. ايه اللي أنا كاتبه ده ؟ .. كلام أنا مش فاهمه .. كنت فاكر نفسي فاهم فلسفة و كنت بتكلم على هذا الأساس .. أتاري الفلسفة دي شئ تاني خالص .. كلامها مفهوم و مبدأها واضح .. أومال ايه اللي أنا كنت بكتبه ده ... هلفطة ! ... أحدهم قال لي " انت اتعلمت الفلسفة فين ؟" ، و آخر بيقول لي " انت بتتفلسف ليه " ، و كثير تانيين بيقولوا " يعني ايه ؟" ، و أكثر من الكثير بيسكتوا و مش عايزيني أتكلم تاني ... دلوقتي عرفت انه كلامي "العبيط" اللي كتبته - أحيانا- و اللي قلته -كثير- ما لوش أساس من الصحة .. قال و انا كنت فاكرهم بيسكتوا عشان ما فهموش و صيحة العبقرية في دماغي تشتغل و افتكر اني أنا بس اللي بفهم في الدنيا دي .. غلط يا حبيبي .. انت غلطان .. انت عبيط .. انت متذاكي .. انت .. انت .. الكلام ده كله عمال بيدور في دماغي و كل يوم بكتشف اني كنت مغفل أو أحمق اليوم اللي بعده .. ما انكرش ان طريقة كلامي أبعدت عني ناس "غير مرغوب فيهم" كثير ... لكن في نفس الوقت منعت اني استمتع لي شوية قبل ما اموت ... خدوا بالكم أنا بكتب كلامي ده بسرعة و من غير تفكير ... ده مجرد تفريغ للأفكار ليس إلا .. و اعذروني لأن طريقتي هتتغير بعد كده و مش هكتب عن نفسي تاني ... مش هنشر عن نفسي تاني ... و مش عارف ليه أنا أخدت القرار ده .. يمكن علشان برجع أضحك على نفسي ... ما علينا ... دعواتكم .. عارف انكم بتدعوا لكن ادعوا تاني ان ربنا يوفقني ..

ايه حكاية العنوان " ليس إبداعاً و لكنها .. عبقرية " ؟

من فترة قرأت بوست في مدونة "دماغي" و هو عبارة عن تقليد أو محاكاة لطريقة المدونين في الكتابة .. كان بوست رائع .. و بعد أن قرأته تذكرت البوست اللي كان كاتبه " المهندس " .. و استغرقت فتره متابع المدونات دي اللي تم تقليدهم في البوستين دول :

• " المدونون يجيبون .. لماذا سقط الطالب " .. مدونة دماغي .
  
• " مشاركة إجبارية " .. مدونة المهندس .
  

للي قرأ البوستين اللي أشرت ليهم ... الحكاية مش مجرد تقليد ... ده الواحد من دول بيحاكي الشخص بالضبط ... يعني مثلاً كتب بلساني "المهندس" في بوسته "مشاركة إجبارية " :

محمد صلاح ..
-----------

"عندما هرب القلب ...من البهجة .. وجري ورائه.. الحلم ..وطاردهما الفأر .. ومن ورائهم القط ... وتركهم الكلب لانه كان حزينا ... حد بقي يفهمني .. احنا ليه بنعمل يوم للبهجة ؟ .. يعني انتوا شايفين ايه اللي يسعد في دنياكم من اساسه ؟ ... وبعدين انا حلمت حلم غريب .. وعاوز حد يفسره ... بس خلوا بالكم الحلم كان بالابيض والاسود لانه حلم قديم ... لقيت " الخديوي " عباس ... بيسلم علي امين عام الامم المتحدة .. وبيقوله يبلغ " هتلر " انه مستعد يخلي " فاروق " يدخل معاه.. الحرب .. بس بشرط انه يمنع قيام دولة اسرائيل .
طبعا الاحلام الغريبة دي اللي " بالابيض والاسود " بتاجي في اليوم اللي بأعدل المدونة 5 مرات فقط ... اصل انا في المعتاد ... بأعمل 3 مدونات في اليوم ... واغير قوالبهم 19 مرة فقط ... لكن مش مهم ... انا هنشر النهاردة عن .. " انيس منصور " ... المعلومات من " زيكوبيديا " ... يعتبر انيس منصور ... واحدا من ...... وهو ...... ودخل الجامعة ...... وعمل ...... وسوي ...... وجايبلكم 900 كتاب من تأليفه ... بس ياريت تقدروا تكملوا البوست لحد الاخر .... وبعدين اللي عاوز يعلق ... يعلق براحته ... انا مرات بأرد في نفس اليوم ... ومرات بعد 3 اشهر ... مش مهم ... مدونتي وانا حر فيها ... يالا سلام. "

بالله عليكم مش شايفين اني بعمل كده ؟ .. أنا أبصم بالعشرة ان الكلام ده كلامي .. و دي كانت طريقتي .. لكن هل دي كانت شخصيتي ؟ ... و الله منا عارف .. و لا عايز أعرف ...

الواحد بيعيد ترتيب أوراقه من الأول و جديد .. هو أنا بكتب ليه ؟ .. الإحساس ده عندي من زمان .. ربنا يسهل و اعرف أعيش سني بعد الامتحانات ..


اعصروني ... مش هقدر أروح أقرأ تدويناتكم كلكم ... فليقرأ كل منكم تدويناته لي ... ها أنا منصت .

ملحوظة : مش ناوي أغير التصميم ده أبداً ... !